मराठी भाषा संवर्धन पंधरवडा

भवन्स महाविद्यालय (अंधेरी -पश्चिम )

मराठी भाषा संवर्धन पंधरवडा २०१९ – (कार्यक्रम वृत्तांत )

 

                 अंधेरी येथील भवन्स महाविद्यालयात १ जानेवारी ते १५ जानेवारी २०१९ या काळात मराठी भाषा संवर्धन पंधरवडा मोठया उत्साहात साजरा केला. या काळात विविध स्पर्धांचे  आणि कार्यक्रमांचे आयोजन करण्यात आपले होते. या स्पर्धांमध्ये  केवळ महाविद्यालयीन विद्यार्थीच नव्हे तर शिक्षकेतर कर्मचारीही उत्साहाने सहभागी झाले होते. दिनांक ३जानेवारी रोजी क्रांतीज्योती सावित्रीबाई फुले यांच्या जयंतीचे औचित्य साधून या पंधरवड्याच्या कार्यक्रमांना प्रारंभ झाला.प्रा. नेहा सावंत यांनी मराठी भाषा पंधरवडा साजरा करण्याबद्दलचे प्रास्ताविक केले.   याप्रसंगी नायर हॉस्पिटलच्या आहारतज्ञ  श्रीमती जयश्री परांजपे यांचे ‘ जीवनशैली आणि आहार ‘ याविषयावरील व्याख्यान आयोजित करण्यात आले होते. प्राचार्या  डॉ . झरीन बथेना यांनी व प्रमुख पाहुण्या जयश्री परांजपे यांनी सावित्रीबाईंच्या प्रतिमेस पुष्पहार घातला . प्रा. मंथन देसाई यांनी आहारतज्ञ जयश्री परांजपे यांचा परिचय करून दिला. आहार व जीवनशैली विषयक व्याख्यान अतिशय उद्बोधक होते. व्याख्यानानंतर विद्यार्थ्यांशी प्रश्नोत्तराच्या स्वरूपात  चर्चा फारच रंगली. प्रा.सुप्रिया सबनीस  यांनी आभारप्रदर्शन केले.

                  दिनांक ४ जानेवारी रोजी महाराष्ट्राचे महाकवी ग. दि. माडगूळकर, महान संगीतकार सुधीर फडके आणि महाराष्ट्राचे लाडके व्यक्तिमत्व पु.ल.देशपांडे  या महान व्यक्तिमत्त्वांच्या जन्मशताब्दीनिमित्त   ‘ त्रिदल काव्यगीत मैफिल ‘ या कार्यक्रमाचे आयोजन करण्यात आले होते.या कार्यक्रमाची संकल्पना प्रा. नेहा सावंत यांची होती.कार्यक्रमाविषयक प्रस्तावना व अतिथी परिचय प्रा. डॉ. निर्मला पवार यांनी केले.  या कार्यक्रमात आकाशवाणी कलावंत श्रीमती अंजली पाटील  गदिमांनी लिहिलेली व सुधीर फडके तसेच पु ल देशपांडे यांनी संगीत दिलेली गाणी सादर केली तर प्रा. नेहा सावंत यांनी गदिमांच्या कवितांचे सादरीकरण तसेच कार्यक्रमाचे निवेदनही केले. प्रा. सुप्रिया सबनीस आणि प्रा. डॉ. अजय कांबळे यांनीही गदिमांची गाणी सादर केली. कार्यक्रम अतिशय रंगतदार झाला. विद्यार्थी, शिक्षक व शिक्षकेतर  अतिशय मंत्रमुग्ध झाले होते. प्रा. शैला माने यांनी मराठी काव्यपरंपरेच्या नेमक्या शब्दात आढावा घेऊन आभार प्रदर्शन केले.

                  दिनांक ५ जानेवारी रोजी ‘ भाषा संवर्धन व  प्रदूषण निर्मूलन, या विषयांवर  घोषवाक्य लेखन स्पर्धेचे आयोजन करण्यात आले होते.  याच दिवशी विविध साहित्यिकांच्या साहित्यकृतीं परिचय व्हावा या हेतूने  अभिवाचन स्पर्धाही घेण्यात आली.

                  दिनांक ७ जानेवारी रोजी शब्दकोडे हि स्पर्धा घेण्यात आली. विद्यार्थ्यांचा शब्दसंग्रह वाढावा तसेच मराठी संस्कृती व इतिहासाचा परिचय व्हावा या हेतूने ‘ मराठी आभुषणं, महाराष्ट्रातील  सण व उत्सव, महाराष्ट्रातील तीर्थक्षेत्रं , व महाराष्ट्रातील पर्यटन स्थळे अशा विविध विषयांवर शब्दकोडी तयार करण्यात आली होती.   शब्दकोडे  या स्पर्धेत विद्यार्थी व शिक्षकेतर कर्मचारी मिळून ५० जण सहभागी झाले होते.  याच दिवशी  देशपांडे यांच्या ‘ रविवारची सकाळ ‘ या  नाट्यकृतीची  चित्रफीत दाखवण्यात आली. विद्यार्थ्यांनी या नाट्यकृतीचा मनमुराद आनंद घेतला.

                  दिनांक ८ जानेवारी रोजी सुप्रसिद्ध कवी बालकवी व गोविंदाग्रज यांच्या स्मृतिशताब्दीनिमित्त कविता वाचनाची स्पर्धा घेण्यात आली. त्यानिमित्ताने या कवीच्या कवितांचा परिचय विद्यार्थ्यांना झाला. वरील सर्वच स्पर्धांमधील विद्यार्थी व शिक्षकेतर कर्मचारी यांचा सहभाग उल्लेखनीय होता.

                  दिनांक ९ जानेवारी रोजी मराठी विभागाच्या विद्यार्थ्यांनी पु ल देशपांडे यांच्या ‘ वाऱ्यावरची वरात ‘ मधील  काही नाटयांशाचा  आविष्कार सादर केला. हे सादरीकरण फारच रंगतदार झाले. या कार्यक्रमानंतर  भाषा संवर्धन पंधरवड्या प्रित्यर्थ घेण्यात आलेल्या स्पर्धाचा पारितोषिक वितरण समारंभ झाला प्राचार्य डॉ. झरीन बाथेना , उप प्राचार्य डॉ. गीता शेट्टी आणि उपप्राचार्य डॉ. रेखा शर्मा यांच्या हस्ते पारितोषिक वितरण करण्यात आले.विद्यार्थ्यांमध्ये वाचन संस्कार रुजावा व अवधवा या हेतूने  विजेत्या स्पर्धकांना  स्वरूपात विविध लेखकांच्या   साहित्यकृती व प्रशस्तीपत्रके देण्यात आली. एकंदरीत कार्यक्रमांनी गच्च भरलेला आठवडा सगळ्यांनाच मनस्वी समाधान देऊन गेला. EMC (EVENT MANAGEMENT  COMMITTE )च्या समन्वयक डॉ. शैला माने तसेच प्रा. नेहा सावंत, डॉ. निर्मला पवार, पर. मंथन देसाई, प्रा राहुल सूर्यवंशी , प्रा सुप्रिया सबनीस, डॉ. उज्ज्वला  फाटक, अनुप्रिता त्र्यंबककर यांच्या सक्रिय सहभागामुळे  विद्यार्थी , शिक्षक व शिक्षकेतर कर्मचारी यांच्यात मराठी भाषाभिमान जागृत करण्यात तसेच एकमेकांमध्ये  सौहार्दपूर्ण संबंध निर्माण करण्यात हा मराठी भाषा संवर्धन पंधरवडा निश्चित यशस्वी झाला असे म्हणता येईल.

                                                वृत्तांतलेखन – प्रा. नेहा सावंत

Left Menu Icon

Bhavan's College Andheri (West)